Kodavantimata

కొంగు బంగారమౌ కొడవంటి మాట (వేదాంతం)

http://vedantam7.blogspot.in/

ఓం రామలాల్ ప్రభు సమారంభాం నారాయణ ప్రభు మధ్యమాం

అస్మాదాచార్య పర్యంతామ్ వందే గురు పరంపరామ్

1.ఈశ్వరుండు గలడు ఈ శరీరమునందు - దిశ మారినను చాలు దైవ దర్శనమ్మగును

కక్ష్య మారినయట్లు గ్రహము గ్రహమునకు - కొంగు బంగారమౌ కొడవంటి మాట

2.తోలు కనులకు దైవ దర్శనము దుర్లభము - కోలుకొని మనసు మరుగు పడిన చాలు

కల్గు మూడవ కన్ను కనుబొమల నడుమ - కొంగు బంగారమౌ కొడవంటి మాట

3. జలము కలుషితమైన కనజాలమేమియు - జలము నిర్మలమైన నిజము తెలియు

మనసు నిర్మలమైన నిజరూపదర్శనమె - కొంగు బంగారమౌ కొడవంటి మాట

4. మనుషుల మనసు మారుట సహజమ్ము - మనసు మధియింప మహనీయుడగును

మనలోని మహనీయుడాదేవదేవుడే - కొంగు బంగారమౌ కొడవంటి మాట

5. జిడ్డు కృష్ణమూర్తి జగతిలో వేదాంతి - జిడ్డు వదిలించుకొని జితేంద్రియుడయ్యె

జడ్డి తనము వీడ జయము తధ్యము సుమ్మి - కొంగు బంగారమౌ కొడవంటి మాట

6. నేను ఎవరొ తెలియమన్నారు రమణులు-నేను నీవు ఒకటె శరీరము వేరు   

లోని గుట్టు తెలియ లోకమ్మె తెలియును - కొంగు బంగారమౌ కొడవంటి మాట

7. శాంతి మార్గమె ముద్దు యుద్ధమసలే వద్దు - శాంతి దూతవు నీవు  జ్ణాన జ్యోతివి నీవు

జ్యోతినే వెలిలించు బాహ్యాంతరములందు  - కొంగు బంగారమౌ కొడవంటి మాట 

8. సూర్యోదయమ్మెపుడు శుభమునే కాంక్షించు - సూర్యుడే లేకున్న సృష్టి అనునది కల్ల

సూర్యుడే మనలకు సూటియౌ దైవము - కొంగు బంగారమౌ కొడవంటి మాట

9. మనసున్న మనిషికే మౌనమ్ము చెల్లు - మనసు లేకున్నచో మనుగడే లేదు

మనసులో మర్మమే మహాయోగమ్ము - కొంగు బంగారమౌ కొడవంటి మాట

10. అర్ధమక్కరలేదు అసలైన బాబాకు – వ్యర్ధవేష ధారి వేనవేలాశించు

స్థితప్రజ్ఞునకు సిరి సంపదలు ఏల – కొంగు బంగారమౌ కొడవంటి మాట

11. మనోనేత్రము తెరవ మార్గమే తెలియు - మనసు రంజిల్లెడి మర్మమే తెలియు

మనోజయమ్మున మృత్యుంజయుండగు - కొంగు బంగారమౌ కొడవంటి మాట

12. మనసులేని బ్రతుకు నరకమేనంట - మనసున్న మనిషికి సుఖము లేదంట

మనసు మనసున నిలుప మహనీయుడంట - కొంగు బంగారమౌ కొడవంటి మాట

13. తినగ తినగ వేము తియ్యనగును - మనసు మూలమ్మే  మాయరోగమ్ము

కనుము మూడవ కన్ను కనకాభిషేకమే - కొంగు బంగారమౌ కొడవంటి మాట

14. గుండె చప్పుడు నీకు గుడిగంట కారాదు - గుండె గూటిలో గుహ్యమగు గురుతుంది

ఒడిసి పట్టిన చాలు విశ్వ దర్శనమే - కొంగు బంగారమౌ కొడవంటి మాట

15. సకలమ్ము నిండెనదె సచ్చిదానదమ్ము – అకలంకునాత్మ అది అంతటను నిండె

నికరమగు చూపుననె నిజరూప దర్శనము -  కొంగు బంగారమౌ కొడవంటి మాట

16. ఆత్మయే నిత్యము ఆత్మయే సత్యము – ఆత్మయే నీవు అన్యమ్ముగావు

ఆత్మ స్వరూపమే అంతటను నిండె - కొంగు బంగారమౌ కొడవంటి మాట

17. అహము వీడిన చాలు ఆత్మ దర్శనమగును – ఆహరహము ఆనంద నందనమ్మగును  

మహిలోన దివ్యమౌ దర్శనమ్మిది సుమా -  కొంగు బంగారమౌ కొడవంటి మాట

18. నీవు నీవుగాని నిక్కమొక్కటి గలదు – నీవు ఎవరో తెలియ నిత్య ఆనందమే

నీవు నిర్మలుడవు  నిరంజనుడవు - కొంగు బంగారమౌ కొడవంటి మాట

19. ఉపవాసమన కడుపు కాల్చుట కాదు – ఉప వసించుటయే దేవదేవునకు

ఉపవాసి ఎల్లపుడు ఉల్లాసముగనుండు -  కొంగు బంగారమౌ కొడవంటి మాట

20. జీవన్ముక్తుడై ఉండగలిగెడి యుక్తి – జీవియందెల్లపుడు జీవించి యుండు

జీవ భావము వీడ దైవత్వమబ్బు - కొంగు బంగారమౌ కొడవంటి మాట

21. మనసు అనునది మార్పు చెందుచునుండు – మనసు గతి నిర్జించు మార్గమొక్కటియె

మనో జయమ్మున మృత్యుంజయుండగుటె - కొంగు బంగారమౌ కొడవంటి మాట

22. నేడు యోగమ్మనిన ఆరోగ్యమునకండ్రు – నాడు యోగమ్మనిన మేటి యోగులకెరుక

నాడు నేడును ఎఱుక నీవు ఎవరవొ తెలియ -  కొంగు బంగారమౌ కొడవంటి మాట

23. కాంతా కనకములు కానరావాతనికి – అంతరాత్మను అతడు ఆహరహము దర్శించు

అంతర్ముఖుండతడు అవనిలో అమృతుడు - కొంగు బంగారమౌ కొడవంటి మాట

24. విత్తమందాశతో విహరించు యోగివలె – చిత్తమును తెలియని చిత్తరువు పగిది

చిత్తము జయించిన చైతన్యుడే యోగి -  కొంగు బంగారమౌ కొడవంటి మాట

25. అంతరము తెలియని అతడెట్లు యోగి – అంతయును నాదనెడి ఆత్మ వంచన తప్ప

అంతరాత్మను తెలియునాతడే యోగిరా - కొంగు బంగారమౌ కొడవంటి మాట

26. యోగమనగా వడలు వంచుకొనుట కాదు – యోగి వేషమున విహారము కాదు

యోగమనగా మనిషి మహనీయుడగుటయే - కొంగు బంగారమౌ కొడవంటి మాట

27. ఇంపైనవన్నియు ఇహ లోక సుఖములే – కంపు మయమైపోవు కాల గమనమున

సొంపైన చైతన్య దర్శనమె సౌఖ్యమ్ము - కొంగు బంగారమౌ కొడవంటి మాట

28. మతము మతము అని మారాము చేయకు – మతములోనను లేదు మానవ గమ్యము

ఆత్మ తత్త్వము తెలియ అంతయు మిథ్యయే - కొంగు బంగారమౌ కొడవంటి మాట

29. భూతద్దమున భాను కిరణమే జ్వలియించు – అంతరాత్మయందు ఆనంద జ్వలనమ్ము

ఎంత తెలిసినగాని సుంతయే అది సుమ్మి - కొంగు బంగారమౌ కొడవంటి మాట

30. సూర్య కిరణము సూది మొనదేలు కటకమున – సౌర శక్తికి సాటి ఏమియు లేదుగద

సౌర శక్తియె గలదు ప్రతి శరీరమునందు - కొంగు బంగారమౌ కొడవంటి మాట

31. మోడువారిన మాను మొగ్గ తొడుగుట కల్ల – ఏడేడు వసంతాలెదురైననుగాని

మూడు నాళ్ళ బ్రతుకు మూలమ్ము తెలియరా - కొంగు బంగారమౌ కొడవంటి మాట

32.  కుక్క పంది యేన్గు కుడుములు కావవి - తిక్క పెట్టించెడి తంటాలు తెలియంగ

తిక్కలన్నియు తీర్చు తురీయావస్థయే - కొంగు బంగారమౌ కొడవంటి మాట 

33. పరమాత్మను చూచు పరికరములే వేరు - పర తత్త్వమగు జ్యోతి వెలగవలె లోలోన

పరమాత్మ దర్శనము పదము పదమునకు - కొంగు బంగారమౌ కొడవంటి మాట 

34. దేహ ధారివి నీవు దేహివి నీవు – దేహిని మృత్యువు ముట్టుటయె కల్ల

దేహియే దైవము సాధననె సాధ్యము - కొంగు బంగారమౌ కొడవంటి మాట 

35. విత్తమందాశను వీడుము మొదట – చిత్తము చిదంబరమందుంచుము పిదప

ఆత్మ దర్శనమపుడె తధ్యము సుమ్మి - కొంగు బంగారమౌ కొడవంటి మాట 

36. గాలి బుడగయె కదా ఈ జీవితమ్ము – జాలి వుండదు అది జఱ్ఱున జారు

కాల గమనము అది కడు విచిత్రమ్ము - కొంగు బంగారమౌ కొడవంటి మాట 

37. గమ్యమ్మునెరిగెడి మర్మమ్ము తెలియ – చిన్మయమ్మగునట్టి తావేదొ తెలియు

ఆత్మ దర్శనమదియె అమరత్వమదియే - కొంగు బంగారమౌ కొడవంటి మాట

38.  గుడి గంట కావాలి గుండెలోని గంట – గుడియె దేహమ్ము గంటయే పరమాత్మ

గుడిలోని గంటయే నిజముగా నీవు - కొంగు బంగారమౌ కొడవంటి మాట

39. పుట్టుట గిట్టుట తెలియని బ్రతుకు –మట్టిలో కలసి మాయమగు బ్రతుకు

గట్టు చేరెడి గుట్టు తెలియని బ్రతుకు  - కొంగు బంగారమౌ కొడవంటి మాట

40. నేను ఏదియు కాదు అన్నియు నేనే – నేను నీవు తెలియ నిఖిలమ్ము తెలియు

నేను నీవునొకటె నిత్య సత్యమ్మిదియె  - కొంగు బంగారమౌ కొడవంటి మాట

41. ఊర్ధ్వ దృష్టి వలన ఔన్నత్యమే పొందు – ఆర్ద్రత ఉప్పొంగ ఆత్మ దర్శనమగు

మర్మమంతయు తెలిసి మృత్యుంజయుండగు - కొంగు బంగారమౌ కొడవంటి మాట

42. ఆనందమంతయు అంతరముననె గలదు – జన్మ రాహిత్యమౌ జన్నమును గలదు

మేను మై మరపించి మర్మమును గాంచుమా - కొంగు బంగారమౌ కొడవంటి మాట

43. తపము చేయ తనువు తన్మయత్వమునొందు – తపము చేయ తత్త్వదర్శనము గలుగు

తపము చేయ తనువు తంటాలు తీరురా -  కొంగు బంగారమౌ కొడవంటి మాట

44. గురుడనంగ గుహ్య విద్యకే గురుతు – గుర్తుగాను గుహ్య నేత్ర దర్శనమ్మగును

మరువలేని మోక్ష సామ్రాజ్యమది సుమా - కొంగు బంగారమౌ కొడవంటి మాట

45. యోగమనగ ఆత్మ ఐక్యమ్ము సుమ్మి – యోగమనగ సత్య దర్శనము సర్వత్ర

యోగమనగ యోగ్యమైనట్టి విద్యరా - కొంగు బంగారమౌ కొడవంటి మాట

46. భక్తి భావము నిండ నిండినను చాలు – భవ బంధమ్ములు తొలగినను చాలు

భవుడు ప్రత్యక్షమ్ము బొంది లోపలను - కొంగు బంగారమౌ కొడవంటి మాట

47. క్షరము అగునదియే  దేహమ్ము సుమ్మి అ – క్షరమ్మది ఆత్మ నశియించదెపుడు

ఆక్షర సత్యమ్ము అనాదినుండిదియె -  కొంగు బంగారమౌ కొడవంటి మాట

48. భక్తి ప్రదమైనది భగవాను వెలుగు – శక్తి ఎంతో గలది సూర్యదేవుని వెలుగు

ముక్తి మార్గమునకే మూలమగు వెలుగు - కొంగు బంగారమౌ కొడవంటి మాట

49. ఆస్తికత్వమ్మే అలరారెడి వెలుగు – ఆస్తితో కొనలేని అవ్యక్తమగు వెలుగు

ఆ స్థితిలొ మాత్రమే వ్యక్తమగు వెలుగు - కొంగు బంగారమౌ కొడవంటి మాట

50. దేహియైన వెలుగు దేహమున వెలుగు – గుహ్యమైన వెలుగు గురుదేవు వెలుగు

దహరవిద్యలోని దైవమే ఆ వెలుగు - కొంగు బంగారమౌ కొడవంటి మాట

51. కనుబొమల నడుమ కాంతి పుంజమ్ము – జ్ఞాన నేత్రమ్మదియె విజ్ఞానమదియె

అనుభవమ్మగునట్టి ఆత్మ దర్శితమదియె -  కొంగు బంగారమౌ కొడవంటి మాట

52. కాంతా కనకముల ఆశ వీడినగాని – శాంతము సౌఖ్యము కలుగుటయె కల్ల

సాంతమగు మనసునకె కాంతి దర్శనము - కొంగు బంగారమౌ కొడవంటి మాట

53. మహా ప్రస్థానమీ మహిలోన తధ్యము – మహదానందమది మనమెవరొ తెలియు

మహితాత్ముడౌ దేవ దేవుడే ప్రతి జీవి - కొంగు బంగారమౌ కొడవంటి మాట

54. మనసునాడించెడి మర్మమే నీవు – మనసు మర్మము తెలియ మాయ తొలగు

మనసునే మధియింప మహితాత్ముడే గదా - కొంగు బంగారమౌ కొడవంటి మాట

55. దృష్టి మూలము తెలియ ద్రష్టయగును – సృష్టియే తెలియు సుస్పష్టముగను

అదృష్టమదియే అవని లోపలను - కొంగు బంగారమౌ కొడవంటి మాట

56. ఈసునియందాసనుంచినను చాలు – శ్వాసను శాంతము పరచినను చాలు

అశాంతి లేనట్టి ఆత్మ దర్శనమగును - కొంగు బంగారమౌ కొడవంటి మాట

57. నీవు నేనే సుమ్మి నేను నీవే సుమ్మి – నీవు నిజమ్ముగ నిర్గుణుండవు సుమ్మి

నీవు నిండితివి నిఖిల జగమునను - కొంగు బంగారమౌ కొడవంటి మాట

58. నిజమునెరిగిన గురుడె నీకు దైవమ్ము – నిజము నిజమిది అని నిక్కమ్ము తెలుపు

నిజము తెలియును నీకు నిజ మార్గమును - కొంగు బంగారమౌ కొడవంటి మాట

59. నిత్య సంతోషివి నిజముగా నీవు – సచ్చిదానంద స్వరూపుదడవీవు

మాతాతీతమ్మగు మర్మమే నీవెగా - కొంగు బంగారమౌ కొడవంటి మాట

60. సత్య దర్శియైన సామ్రాట్టు ఒక్కడే – సత్య సాధనమున గమ్యమ్ము చేర్చు

సత్య దర్శనమగును నిత్యము నీకు - కొంగు బంగారమౌ కొడవంటి మాట

61. ఆత్మయే నిత్యము ఆత్మయే సత్యము – ఆత్మ రూపమె నీవు ఆనందమే నీవు

ఆత్మయే వ్యాపించె అణువణువునందు - కొంగు బంగారమౌ కొడవంటి మాట   

62. మార్పు ప్రతి మనిషికి సహజమ్ము సుమ్మి – మారుచు నుండును క్షణము క్షణమునకు

మార్పులేనిది అది  మోడుయగు సుమ్మీ - కొంగు బంగారమౌ కొడవంటి మాట  

63. నీలోన నాలోన నిజము దాగున్నది – ఆలోచనముననే అసలు తెలియు

సాలోచనముననే సర్వము తెలియును - కొంగు బంగారమౌ కొడవంటి మాట

64. నిత్య క్రతువే బ్రతుకు నిక్కమ్ము వేరు – నిత్య సంతోషికే నిజము తెలియు

అత్యంత ఆనంద ఆత్మానందమది – కొంగు బంగారమౌ కొడవంటి మాట

65. సేతు బంధనమే తేలిక అనుకొనిన – దేహ బంధనమున  దేహి దర్శనమగు 

దేహియే దైవము స్వస్వరూపమ్మదియె - కొంగు బంగారమౌ కొడవంటి మాట

66. ధ్యానమనగ దేవదేవు దర్శనమ్ము – ధ్యానమనగ దేహి దర్శనమ్మే సుమా

ధ్యానమున దర్శించు స్వస్వరూపమ్మదియె - కొంగు బంగారమౌ కొడవంటి మాట

67. ఆదిత్యుడది ఏమి అస్తమించుట ఏమి – అది భ్రాంతియే కాని అసలు కాదు

నాది శరీరము కాని నేను వేరే కదా  -  కొంగు బంగారమౌ కొడవంటి మాట

68. డొంక తిరుగుడె గదా డొల్ల దేహమ్ము – డొంక సరిచేసిన దొరతనమ్మబ్బు

డొంకలో గలడు దొడ్డ దేవరయే - కొంగు బంగారమౌ కొడవంటి మాట

69. జీవితాంతమువరకు జీవించ వలెను – జీవితము లోగుట్టు తెలుసుకో వలెను

జీవ భావము వీడ దైవత్వమబ్బు -  కొంగు బంగారమౌ కొడవంటి మాట

70. శుభము ఎల్లపుడూ శుభమునే కోరు – శుభమునకు రేబవలు కానరాదు

శుభమైన మనసుకె సుఖము కలుగు - కొంగు బంగారమౌ కొడవంటి మాట

71. ముచ్చట ఐనది  ముణ్ణాళ్ళ ముచ్చటయె – మచ్చుకైనను అది మిగలుట కల్ల

వచ్చును పోవును వెవేల జన్మలు - కొంగు బంగారమౌ కొడవంటి మాట

72. నిజముగా చూసేది నిద్రలో చూసేది – నిజముకాదవి నిజము నీదు భ్రాంతి

నిజము నీకు తెలియు నిను నీవు తెలియ -  కొంగు బంగారమౌ కొడవంటి మాట

73. మానవుని పెన్నిధి మాధవుని సన్నిధే – మనసు నిర్మలమైన మాయ మాసినను

మనోజయమును పొంది మాధవుని చేరు - కొంగు బంగారమౌ కొడవంటి మాట

74. అష్ట దిక్కులును అరుణోదయము భ్రాంతి – నామ రూపమును నీవు నేను భ్రాంతి

భ్రాంతి లేని బ్రతుకు బ్రహ్మానందమే - కొంగు బంగారమౌ కొడవంటి మాట  

75. రజ్జు సర్ప భ్రాంతి రాకపోకలు చూడు – ఎండ మావులవలే అండ లేని బ్రతుకు

రాజు పేదైనట్లు రంభ వచ్చినయట్లు - కొంగు బంగారమౌ కొడవంటి మాట 

76. దేహమే దేవళము దేవళమె దేహము – దేహ దేవళములయందలిదె దేహి

దేహినే తెలియంగ దేహముతొ పనిలేదు -  కొంగు బంగారమౌ కొడవంటి మాట 

77. ఛిద్రమైన మనసు శాంతింపజేయ – భద్రముగ బంధమ్ము సడలింపజేయ

చిత్రమైన కాంతి చేర్చు గమ్యమును - కొంగు బంగారమౌ కొడవంటి మాట

78. అరుణోదయమ్మెపుడు ఆహ్లాదకరమే – ఆరంభమది ఆత్మ జిజ్ఞాసువులకు

మరణమే లేనట్టి మహా ఉదయమ్ము -  కొంగు బంగారమౌ కొడవంటి మాట 

79. సూర్యోదయమ్మెపుడు శుభ సూచకమ్ము  – సూర్యోపాసనయె సాధకుల అంతరము  

లోని సూర్యుని తెలియ లోకమ్ము తెలియు - కొంగు బంగారమౌ కొడవంటి మాట

80. అంతర దృష్టితో ఆనందమే నిండు  – చింతలన్ని తీరు చైతన్యముదయించు

అంతమే లేనట్టి ఆత్మ దర్శనమగు -  కొంగు బంగారమౌ కొడవంటి మాట

81. కులమతమ్ముల కుళ్ళు కనరానియట్టి – కలిమితోనెవ్వరు కొనలేనియట్టి

వెలకట్టలేనట్టి వేద సారముగనుమ - కొంగు బంగారమౌ కొడవంటి మాట

82. సంపదగలదని సంబరము వద్దు – సంపద మనకు సాధనయె కాదు

సాధన సంపదయె గమ్యమ్ము చేర్చు  - కొంగు బంగారమౌ కొడవంటి మాట

83. విత్తమ్ముతోను పనియేమి లేదుగా – చిత్తమ్ముతోనే పనియంతయునుగా

విత్తమందాశను వీడుటయె పరము - కొంగు బంగారమౌ కొడవంటి మాట

84. అరిషడ్వర్గాలు ఆవురావురు మనగ – మురిపించి మనసునే మట్టుబెట్ట

దరిశనమె దేహి దివ్యత్వమే కల్గు -  కొంగు బంగారమౌ కొడవంటి మాట

85. ముక్తియే భవబంధ నాశనమ్ము – ముక్తియే నిజభక్తి దాయకమ్ము

ముక్తియే నిజరూప దర్శనమ్ము - కొంగు బంగారమౌ కొడవంటి మాట

86. నవద్వారపురి నాశనమ్మగునది – నవద్వారపురపు నేతవు నీవు

నీవు నిత్యమ్ము నశియించు పురము - కొంగు బంగారమౌ కొడవంటి మాట

87. మృత్యుంజయుడవీవు మరణమే లేదు – అమృతత్వమ్మునే ఆస్వాదింతువు

నిర్గుణమ్మదియె నీదు నిజ రూపు -  కొంగు బంగారమౌ కొడవంటి మాట

88. పుట్టుచున్నారెందరెందరో ఈ పుడమి – పుట్టిరి గిట్టిరి మన పూర్వులెందరో

పుట్టుటలు గిట్టుటలు దేహికిగాదు -  కొంగు బంగారమౌ కొడవంటి మాట

89. మట్టి ముద్దయైన ఈ శరీరము మాయ – మట్టియై పోవు మరు భూమియందు  

గట్టి పట్టు పట్టి గమ్యమును చేరుమా - కొంగు బంగారమౌ కొడవంటి మాట

90. మనసునందు పుట్టె మాయ అంతయును – మనసు విరిగెనేని మాయ తొలగు

మనసు నిలిచేనేని మహి తాను బ్రహ్మము - కొంగు బంగారమౌ కొడవంటి మాట

91. మరణమే లేనట్టి నాద బ్రహ్మము నీవు – పరమ సత్యమ్మిది పరికించి చూడ

చరాచారములు అన్ని చైతన్యమే కదా! - కొంగు బంగారమౌ కొడవంటి మాట

92. మంచి ముత్యమ్మై నీ మనసు ఉన్నది – మంచిగా మలచిన మహా యోగమ్మే

అంచెలంచెలుగా ఆత్మ దర్శనమగును - కొంగు బంగారమౌ కొడవంటి మాట 

93. మనసునే రంజింప మనో నేత్రమ్ము – అమనస్క యోగమే అంతరార్ధమ్ము

ఘనమైన ఆనంద సాగరమ్మదియే - కొంగు బంగారమౌ కొడవంటి మాట 

94. అంతరమునందొక అద్భుతమ్మున్నది – నిత్య సంతోష సాగరమ్మదియే

చైతన్య జగతిలో సంచారమే అది - కొంగు బంగారమౌ కొడవంటి మాట 

95. దైవ దృష్టి వలన ధారణయె గలుగు – దైవమే నీవని నిర్ధారణగును

దేవ దేవుడవీవు దేహివి నీవు - కొంగు బంగారమౌ కొడవంటి మాట

96. భవ బంధమును బంధ మోచనము చేసి – భావమును బాగుగా మలచినంతటనే

భవ్యమగు నిర్గుణుడు నీలోన నిలచు - కొంగు బంగారమౌ కొడవంటి మాట 

97. నామ రూపములవి నామ మాత్రములే – అమరత్వ సిధ్ధికి ఆయుధములు

విమలమగు వేదాంత సారమ్ము ఇదియే - కొంగు బంగారమౌ కొడవంటి మాట 

98. యదార్ధమ్మొక్కటియె ఎల్లరకు దర్శనము – నిదానమ్ముగ అదియె నిత్య దర్శనము

మతాతీతమ్మదియె మోక్ష దర్శనము - కొంగు బంగారమౌ కొడవంటి మాట 

99. జ్ఞానియగు వానికి జ్ఞానమే తెలియు – మౌనివర్యునకు మృత్యుజయమే తెలియు

లోని గుట్టు తెలియ నిజ లోకమే తెలియు -  కొంగు బంగారమౌ కొడవంటి మాట 

100. బొందియుండగ పొందనగునది అదియే – అంతమెరుగని అనంతమ్మును అదియే

మృత్యుజయమును ముక్తి మార్గమును అదియే - కొంగు బంగారమౌ కొడవంటి మాట

101. మాట మౌనమె అయిన మనసు బాట – మాట వికలమె అయిన బతుకు బాట

బాటలో మర్మమే మహరాజ బాట - కొంగు బంగారమౌ కొడవంటి మాట

102. వేదాంతమే నీవు వెలుగువు నీవు – సదా దర్శనమగును సాధకులకు

చిదానందమ్మది చైతన్యమదియే - కొంగు బంగారమౌ కొడవంటి మాట

103. మౌన ముద్ర లోని మర్మమ్ము తెలిసిన – జ్ఞానమ్ము జ్యోతియై దర్శనమ్మగును

మనిషి మనీషిగా మార్పు చెందు -  కొంగు బంగారమౌ కొడవంటి మాట

104. పరమమగు సత్యమ్ము దర్శనమ్మైన – చిరు చిరు నవ్వుల చిన్మయుండగును

ఎఱుకయే గలుగు తానెవరొ తెలియు - కొంగు బంగారమౌ కొడవంటి మాట

105. దేహమ్మునందలి దేవతను తెలియ – దేహమే దేవాలయమ్మని తెలియు

దేహ భ్రాంతిని వీడి దైవమే తానగు - కొంగు బంగారమౌ కొడవంటి మాట

106. దేహమ్మునందే దైవమ్మునకు నెలవు – మహా సంద్రమ్ములో లవణమున్నట్లు

మహనీయుడైయుండ మర్మమ్ము తెలియు - కొంగు బంగారమౌ కొడవంటి మాట

107. దేహధారివి నీవు దేహమ్ము కావు – దేహమ్మునందలి దేవతవు నీవు

ఆహరహము ఆనంద నందనుడవీవు  - కొంగు బంగారమౌ కొడవంటి మాట

108. ఏకాగ్ర చిత్తమున ఎదురు చూచినను – చక్కగా లోలోన చైతన్యముదయించు  

నిక్కముగ నీవేవరొ నీకు తెలియు - కొంగు బంగారమౌ కొడవంటి మాట

109. చూపులోన చూపు చూడుమా ఒకసారి – లోలోన వెలుగునే దర్శింపుమొకసారి

ఈప్సితములీడేరు ఇహము పరమౌను - కొంగు బంగారమౌ కొడవంటి మాట

110. అక్షయమ్మగునట్టి ఆనందమొందిన – లక్షణమ్మగునట్టి వీక్షణమె కలుగు

లక్ష్యమ్ము నీవెయగు రహస్యము తెలియు - కొంగు బంగారమౌ కొడవంటి మాట

111. విశ్వమంతయును నశ్వరమ్మే గదా – శాశ్వతమ్మదియేను శాంతి మార్గమ్ము 

విశ్వ రహితమ్మగు ఆత్మ నీవేగదా - కొంగు బంగారమౌ కొడవంటి మాట

112. దేహి ఎల్లప్పుడు దైవ సంధానమే – బహిరంతరములందు భాసిల్లుచుండు

ఆహరహము ఆత్మయై ఆవిర్భవించు - కొంగు బంగారమౌ కొడవంటి మాట

113. దేహ భ్రాంతిని వీడ దేహివే నీవు – మహిలోన ఎల్లరకు మహా యోగంబు

మహిలోన మర్మమీ మహిమను గనుటే - కొంగు బంగారమౌ కొడవంటి మాట

114. బహిర్దర్శనము బహు విధములైనది – ఆహరహము అంతరమ్మంతటనొకటే

బహిరంతరమ్ముల మర్మమ్ము గనుమా - కొంగు బంగారమౌ కొడవంటి మాట

115. నీలోన నాలోన నిక్కమ్మొక్కటియే – సాలోచనముననే సత్య దర్శనము

ఆలోచనలు ఆగు అద్భుతమ్మదియే - కొంగు బంగారమౌ కొడవంటి మాట

116. ధనముతో పనిలేని దివ్య పురుషుడవీవు – మనసు నిర్మలమైన మనీషివి నీవు

వినయముగ వీక్షింప విశ్వంభరుడవీవు - కొంగు బంగారమౌ కొడవంటి మాట

117. కాళరాత్రియె సుమ్మి కానుపించునది – వేళ మించకుండ వెలుతురును గనుమ

వెలుతురే నీవు వేదసారము నీవు - కొంగు బంగారమౌ కొడవంటి మాట

118. తెలియబడు విశ్వమ్ము దృశ్యమ్ము సుమ్మీ – తెలివితో తెలియుము నిత్య సత్యమ్ము

తెలివిలో తెలివియే తురీయమ్ము  - కొంగు బంగారమౌ కొడవంటి మాట

119. అనుభవ జ్ఞానమే అమనస్కమయ్యె – అనుభవమ్ముననే ఆత్మ దర్శనము

అనూహ్యమ్మైనట్టి అద్భుతమ్మిదియే - కొంగు బంగారమౌ కొడవంటి మాట

120. నిశ్చలత్వమ్మున నిజ రూప దర్శనము – స్వఛ్చమగు శక్తితో సమ్మోహనమ్ము  

రచ్చకీడ్వగలేని రహస్యమ్మిదియే - కొంగు బంగారమౌ కొడవంటి మాట

121. మూడు అవస్థల మూలమును గనుమా – వేడుకల వేల్పు నీవెంట నిలచు

కీడు లేనట్టి కీలకము తెలియు - కొంగు బంగారమౌ కొడవంటి మాట

122. అంచెలంచెలుగా అందలమ్మెక్కిన – చంచలమ్మగు బుద్ధి చైతన్యమగును

వంచనయె లేని వైభవమ్ము కలుగు -  కొంగు బంగారమౌ కొడవంటి మాట

123. వియోగము విరహమై వైరాగ్యమంద – నియోగింపుమ్మొక  నూత్న మార్గమున

శ్రేయో మార్గమే శ్రేష్ఠమైనది కదా - కొంగు బంగారమౌ కొడవంటి మాట 

124. సూర్యోదయమ్మును చక్కగా చూచిన – అరుణోదయమ్మే జరుగును లోలో

కార్యోన్ముఖునకు కఠినమ్ము కాదిది - కొంగు బంగారమౌ కొడవంటి మాట 

125. ఎఱుక ఒక్కటియే ఉన్నతమ్మైనది – ఎఱుకయే గలుగు ఏకాగ్ర చిత్తమున

విరాట్పురుషుడవై వెలుగొందగలవు  - కొంగు బంగారమౌ కొడవంటి మాట 

126. గురుని ప్రేరణయే గురుతుగానున్న – చక్రమ్ములన్నియు చక చక తిరుగు

చిత్రమైనట్టి చిద్రూపమే వెలయు - కొంగు బంగారమౌ కొడవంటి మాట 

127. సంతలోనిదికాదు సాధన అనునది – ఎంత వెచ్చించినా కొనుటకు దొరకదు

వింత పోకడగల వేదాంత సారమది - కొంగు బంగారమౌ కొడవంటి మాట

128. కొబ్బరి కొట్టిన కోర్కెలు తీరునా – నిజముగా దైవము దక్షిణలు కోరునా

నిజ భక్తి కావలె నిర్గుణత్వము తెలియ - కొంగు బంగారమౌ కొడవంటి మాట

129. వత్తి జ్వలనమ్ము నూనె వున్న వరకే – తిత్తి మనుగడయే జీవమున్నవరకె

ముక్తి కాంత వలపు మూలమును గనుమా - కొంగు బంగారమౌ కొడవంటి మాట

130. సత్యముతొ సంధానమదియె సన్యాసమ్ము – సతమతము కావద్దు సంసారమొదలొద్దు

హితము మితముననే ఈప్సితమ్మీడేరు - కొంగు బంగారమౌ కొడవంటి మాట

 131. శిధిలమగునదియే శరీరమ్ము – అర్ధ బలమెంతున్న సుద్ధ వ్యర్ధమ్ము

బుద్ధి బలముననే భానోదయమ్ము - కొంగు బంగారమౌ కొడవంటి మాట

132. చక్ర భ్రమణమ్ము చక్కగా చేసిన – శిరోభ్రమణమ్ము స్థిరముగా చేసిన

దర్శనమ్మగును స్వస్వరూపమ్ము - కొంగు బంగారమౌ కొడవంటి మాట

133. సుషుమ్న అదియే సూక్ష్మ దర్శనము – విషయ వాంఛలకు విఘాతమ్మైనను

విశ్వ రూపమ్మునే కను విందు చేయు - కొంగు బంగారమౌ కొడవంటి మాట

134. అంచెలంచెలుగా అందలమ్మెక్కాలి – అక్కడనె నీకు నిక్కమ్ము తెలియాలి 

నిక్కమ్ము తెలిసిన నీకు విజయమ్మే - కొంగు బంగారమౌ కొడవంటి మాట

135. అనుభవమ్ముననే ఆస్తికుండగును – లేనివారందరు నాస్తికులె సుమ్మి

అనుభవమ్మనిన బ్రహ్మానుభవమే - కొంగు బంగారమౌ కొడవంటి మాట

136. నిప్పు నివురుగప్పి నిండుగానుండు – ఉప్పు కప్పురంబునొక్క పోలికయే

చెప్పలేము మనము చైతన్యుడెవరో - కొంగు బంగారమౌ కొడవంటి మాట

137. విజ్ఞానమయకోశమొకసారిగనుమ-సుజ్ఞానివైతేను సూటిగాగానుమ

ఏ జ్ఞానమైన ఏకాగ్రతనె గలుగు -కొంగు బంగారమౌ కొడవంటి మాట

138. మాయ కమ్మి యుండె మసి బారి పోయె – మాయదారి దారి మనలోన కలదు

మాయయే తొలగిన మహా దర్శనమె - కొంగు బంగారమౌ కొడవంటి మాట

139. పుట్టి గిట్టు నట్టి చట్టు బండయెకదా – మట్టిలో మట్టియై మటుమాయమగును

గుట్టునే కనుగొని గట్టునే చేరుమా - కొంగు బంగారమౌ కొడవంటి మాట

140. నీలోన నాలోన నిజము దాగుంది – అంతరానందమ్ము చవిచూపుతుంది

అంతటను నిండి హాయిగొలుపుతోంది - కొంగు బంగారమౌ కొడవంటి మాట

141. లోలోనగల ఇంద్ర ధనుసు దర్శింప – జలమంతరించు జ్యోతి ప్రజ్వలించు

జ్వలియించు జ్యోతియే జగము చూపించు - కొంగు బంగారమౌ కొడవంటి మాట

142. గురు పరంపరలో గుట్టునెరిగినను – పర తత్త్వమే తెలియు పామరునకైన

సర్వత్ర రంజిల్లు చైతన్యమే వెలయు - కొంగు బంగారమౌ కొడవంటి మాట

143. కనులార్పకుండ కాలమును వీక్షింప – కనులార గాంచు కమనీయ కాంతి

కనుబొమల నడుమ కూటస్తు దర్శనము - కొంగు బంగారమౌ కొడవంటి మాట

144. వీసమైనను ఆస లేకుండ యున్న – ఇసుమంతయైన ఈర్ష్య లేకున్న

వాసనలు అన్నియు వదలునోయన్న - కొంగు బంగారమౌ కొడవంటి మాట

145. ఉన్నది లేనిది ఆనందమైనచో – ఆనందమే నిండు అంతటను నీకు

ఆనంద జలధిలో అమృతము గ్రోలెదవు - కొంగు బంగారమౌ కొడవంటి మాట

146. ఆనందమున్నది నీలోన నాలోన – అదియె మనలోన ఆవిర్భవించె

అది అంతనొక్కటై అంతటను నిండె - కొంగు బంగారమౌ కొడవంటి మాట

147. మాయ జగతిలో మనసు గతి తెలియ – మాయ తొలగు మహదానందమే కలుగు

మాయ వీడిన మనిషి మహితాత్ముడగును - కొంగు బంగారమౌ కొడవంటి మాట

148. అంతరించినయంత అరిషడ్వర్గము – అంతరానందమే అంకురించుచునుండు

అంతరానందమే ఆత్మ దర్శనమగు - కొంగు బంగారమౌ కొడవంటి మాట

149. అద్భుతమ్మైనది ఆత్మ దర్శనము – నిద్దురలొ తెలివిలో నిర్గుణమ్ము

బుద్బుదమ్మగు దేహమందు దర్శనము - కొంగు బంగారమౌ కొడవంటి మాట

150. రాలిపోవును దేహమేనాటికైన – గాలి పోయిన క్షణమె గల్లంతు సుమ్మి

కాలిపోవలసినదె కాటిలో కట్టె - కొంగు బంగారమౌ కొడవంటి మాట

151. రాలిపోవునుకదా రాగమెందులకు – తూలిపోవును కదా తృష్ణ ఎందులకు

మాలిమితొ రంజింప మనోజయమ్మె - కొంగు బంగారమౌ కొడవంటి మాట

152. నేను నాది అని మురియుటెందులకు- వినోదములన్నియు వీడుటే సుఖము

కనుగొని గుహ్యమును కనుల మధ్య - కొంగు బంగారమౌ కొడవంటి మాట

153. ఆటకంతకు మూలమీమాయ మనసు – ఆటంకములు వీడ హాయియే అంతా

కటకమందున కాంతి కనువిప్పు కలుగు - కొంగు బంగారమౌ కొడవంటి మాట 

154. మనసు మూగబోయి మౌనమే భాషైన – మనోనేత్రమ్మొకటి విచ్చుకొనును

మనలోని దేవాది దేవు దర్శనమగు - కొంగు బంగారమౌ కొడవంటి మాట

155. భక్తి పరాకాష్ట భగవదనుగ్రహము – ముక్తి మార్గమునకు మూల సూత్రమ్ము

భక్తి లేకున్నచో ముక్తియే లేదుగా - కొంగు బంగారమౌ కొడవంటి మాట

156. మాయ లోకమ్మెపుడు విభ్రాంతి మయము – మాయను నిర్జింప మహనీయుడగును

కాయమ్ములోనున్న కాంతినే గాంచుమ - కొంగు బంగారమౌ కొడవంటి మాట

 157. తత్త్వమసి అది నీ నిజ రూపమే సుమ్మి – తత్త్వమ్ము తెలియుటే తనువునకు హాయి

సతమతము కావద్దు నీమతమె నీది - కొంగు బంగారమౌ కొడవంటి మాట

158. కాలమ్ము నిర్జింప తరమెవ్వరికి గాదు – కాలమాగదు కోట్లు గుమ్మరించినను

కాలయాపన లేని కర్తవ్యమే మిన్న - కొంగు బంగారమౌ కొడవంటి మాట

159. విశ్వరూపమ్మదియె స్వస్వరూపమ్ము – విశ్వమయమైన చైతన్యమదియే

నశ్వరము దేహమ్ము శాశ్వతము దేహి - కొంగు బంగారమౌ కొడవంటి మాట

160. కొలువయ్యె శివుడు హృదయ కుహరాన – నిలువుటద్దాన నీమాదిరున్నాడు

కల్లోలమే వీడ  కాననగు నిజము - కొంగు బంగారమౌ కొడవంటి మాట

161. అంతరించాలి దేహమను భ్రాంతి – అంకురించాలి దేహమున కాంతి

అంకురించినదే ఆనందమవ్వాలి - కొంగు బంగారమౌ కొడవంటి మాట

162. పరము దర్శించెడి పట్టు కావాలి – పర తత్త్వమందు పట్టు కుదరాలి

పరమ పురుషుడవీవు పరము నీవు - కొంగు బంగారమౌ కొడవంటి మాట

163. ఆలయాన చేయు ఆరాధనే మేలు – ఆలయమె దేహము అంతరాత్మే నీవు  

వెలసెనదె నీలోన విశ్వరూపమ్ము - కొంగు బంగారమౌ కొడవంటి మాట

164. కాలయాపన లేదు కపటము లేదు – కలయజూడు నిన్ను నీవె కాంచెదవు

కల్గునదె నీకు శాశ్వతానందమ్ము  - కొంగు బంగారమౌ కొడవంటి మాట

 165. కొత్త పాతలులేని కొండ దేవరవు – చిత్తమే లేనట్టి చిదంబరుడవు

విత్తమే తెలియని విరూపాక్షుడవు - కొంగు బంగారమౌ కొడవంటి మాట

166, పుట్టుట గిట్టుట లేనివాడవు నీవు – తొట్టతొలి మెట్టుపై దొడ్డ దేవరవీవు

అట్టహాసము వీడ అంతయు తెలియును - కొంగు బంగారమౌ కొడవంటి మాట

167. శక్తి స్థానము నీవు శాశ్వతుడవీవు – శక్తియే నిలచే నీ సహస్రారమున

శక్తి పాతము నీకు సహజమ్ము సుమ్మీ - కొంగు బంగారమౌ కొడవంటి మాట

168. చిద్విలాసుడవీవు చిన్మయుడవీవు – చిదంబరము నీవె చిదానందము నీవె ద్వంద్వాతీతమగు దైవమును నీవె - కొంగు బంగారమౌ కొడవంటి మాట

 169. పరము దర్శించెడి పట్టు కావాలి – పరమాత్మ తత్త్వమ్ము పట్టుకోవాలి

పరమ పురుషుడవు పరమాత్మ నీవు - కొంగు బంగారమౌ కొడవంటి మాట

170. అంతు లేనివియే కొర్కెలనబడును – అంతకంతకు అవి అలవి కాకుండు

చింతలే విడనాడి చిత్తమును శాసించు - కొంగు బంగారమౌ కొడవంటి మాట

171. చిత్తమును శాసింప శాంతి జనియించు – శాంతి మాటుననే చైతన్యముదయించు

చైతన్యమే నీవు శరీరము కావు -  కొంగు బంగారమౌ కొడవంటి మాట

172. అమ్మ అనసూయకు అసూయయె లేదు – అమ్మయే ఆమె అద్వైతమునకు

అమ్మ అందరకు కమ్మనైన మనసు - కొంగు బంగారమౌ కొడవంటి మాట

173. కాషాయమునలేదు ఖద్దరున లేదు – ఆషామాషీ కాదు అంతరమెరుగ

వేషాలు వేయకుర వెఱ్ఱినాగన్న - కొంగు బంగారమౌ కొడవంటి మాట

174. సాధకులకు జయము జయ వత్సరమ్ము – సాధన బాగుగా సాగు సతతమ్ము

వేదాంతసారపు వెలుగు నిండనుగలదు - కొంగు బంగారమౌ కొడవంటి మాట

175. హఠమనంగ సూర్యుడు చంద్రుడు – శరీరమునందుండు ఇడ పింగశులవి

సుషుమ్నోదయమ్మై చైతన్యమే తెలియు - కొంగు బంగారమౌ కొడవంటి మాట

176. మనిషిలో గలదు మర్మమౌ కుండలిని – గుహ్య విద్యయె అది గుట్టుగా తెలియు

పాలలో వెన్నవలే పరిపక్వమగును - కొంగు బంగారమౌ కొడవంటి మాట

177. మీ లోపల నాలోపల లోలోపల గుట్టు తెలియ లోకమె తెలియున్ (అలా తెలిసినవారు)

సర్వ ముక్తులగుచు సర్వము తామగుచు నిర్గుణ తత్త్వమ్ము తెలియగలరు

178. సర్వ మతముల సారమొక్కడే దైవము – సరియైన మార్గమున సాక్షాత్కారమౌ

నిరంజనుడవు నిజముగా నీవు - కొంగు బంగారమౌ కొడవంటి మాట

179. వర్తమానమునే వాస్తవము తెలియు – సద్వర్తనమున సకలము తెలియు

నిర్వికారుడవు నిరాకారము నీవె - కొంగు బంగారమౌ కొడవంటి మాట

180. ఆడంబరములన్ని హరియించిపోవు – నీడయై తోడుండు నిరాడంబరము

నీడయే చేర్చు నిను పరమ పదము - కొంగు బంగారమౌ కొడవంటి మాట

181. దేహ భ్రాంతిని వీడ దేహివే నీవు - దేహికిని లేవు చావు పుట్టుకలు

మహిలోనిదియే మహిమాన్వితమ్ము - కొంగు బంగారమౌ కొడవంటి మాట

182. మనిషిలోనున్నదే మహిమాన్వితంబు – అనితర సాధ్యమౌ అసాధ్యమ్మదియే   జనియించే లోనుండి జటిలమౌ శక్తి – కొంగు బంగారమూ కొడవంటి మాట

183. ఆలయమ్మేదైన ఆదేముడొక్కడే – కాలమే లేనట్టి కాంతిపుంజమ్మదియె

నేల నింగి నిండు నిత్య చైతన్యమే – కొంగు బంగారమౌ కొడవంటి మాట

184. శోధించి సాధించు సత్యము దర్శించు – బాధలెదురైన జయము వరియించు

హంగులన్ని అపుడు అమరియుండు – కొంగుబంగారమౌ కొడవంటి మాట

185. దేహమ్ములోగలదు దివ్యమగు శక్తి – దేహియనబడునదియె ధ్యాతకెరుక 

దేహిగా మారుటే ధ్యానమనబడునుగా - కొంగుబంగారమౌ కొడవంటి మాట